CO' TARA NEKA KABI KEBA HANG

One toing data tua' manga  curup ne nggo': Pio-pio eme hang, neka kabi keba agu  wari - wera hang". Co' tara neka  kabi keba hang?
One nunduk data Manggarai, hang hitu mai one mai po'ng (woja, latung, sela, mesak, tete, teko, tese, daeng, kei, moat). Po'ng situ, wangkan one mai ata manusia.

Ne nggo' nunduk:
Mede,  mata leso jea nera neteng bendar. One ca bendar manga ce ngata ata rona  agu ca pu' betong mose. Betong / belang hitu  wule nger le, wuli ngger lau ikut pur de buru. Dia keta jejongn. Du hitu, nera mata leso hena one betong / belang hitu. Apa jadin? Bengkar belang hitu  jiri ata manusia. Ine wai taran. Du tua ine wai ho' kawing agu ata rona, wiga loas 2 (?) anak. Toe baen, anak ine wai ko anak ata rona. Ise so' toe manga  hang. Darum tukad. Co cara kudut manga  hang (na'ng)  bara?  Toe manga po'ng one lupi ise. Mai cengata  anak koe ho' jaong ne nggo'. Mbele kaku le meu poli hitu  ndetar gisi koe, poli hitu weras neteng bendar," jaong diha. Lut liose. Mbe lise anak koe hitu, ndetar agu weras neteng bendar lise. Pisa leso wa ga do todo po'ng neho woja, latung, tete, teko, kei, moat, tese, daeng. ndesi, labu, buang, kopi, cengke, nggurus, haju, nderu, advokat, pandang, raping.  Senang ise.  Aku lise woja. Gok lise latung, Sake lise daeng.  Hitu te jadi hang dise.
"Ite perlu hiang hang (ute) ai hang (ute) ase kae dite. Neka  kabi keba hang  rantang retang. Hang hitu ase  kae dite.

(JPS 27 Maret 2013)