TOROK TAE AGU KEPOK

1). KEPOK (du tiba Ema Uskup)         (by:  Fransiskus  Jelata (085280510844))

Yo….ema Uskup,

Ata anggom awo, agu ambe  sale   latang  sanggen weki Serani.

Woko ho’ mai dite kamping  ami  lawa  Serani  lateng  titong weki agu wakar dami.

Ami naka ite sama wua nangka;

Ami kapu ite sama  wua  pau;

Porong le mai dite kamping  ami lawa serani,

Imbi dami kamping Mori agu ngaran:

Wake seler ngger wan,

Saung bembang ngger eta

Yo……ema Uskup  rantang  mu’  kanang……..

Ho……tuak kapu dami…….. kapok.

2).TOROK  TAE DU TAKUNG MISA NGGELUK              (by:  Fransiskus  Jelata (085280510844))

Yo… ite ema-ema Pastor agu ema-ema Uskup

One leso ho’ok ami,

Sanggen weki serani,

Ata Sunda, ata Jawa,  ata Batak,  ata Flores  agu lawa Serani Indonesia.

Ami neki weki – manga ranga,

Betuan,  te naring Mori Jari, naka Mori Ngaran,

Latang  apa ata poli tiba  lami.

One takung misa nggeluk ho’g  ami,

Ami condo kamping ite sangged mose agu wakar dami,

Agu sangged gori  agu sangged gesar dami.

Ami hopi kamping Morin, sawal kamping Ngaran, mai kamping Jari.

Ami condo kamping ite sangged sa o sa  agu  sangged  gori agu gejur dami:

Hoos roti hasil  gori dami ( teing /condo Piala / Sibori Hosti ata ba de umat kamping  ema Uskup),

Porong le mu’ luju dite, le berkak de Morin, roti so’ jiri weki de run Mori Yesus,

Kudut sanggen weki Serani ata imbi kamping Hia,

mese bekek agu nggalas wakar te naring agu hiang  Mori Ngaran;

harat  nanang  te  wewa  ata nggalas kudut  mose weki agu wakar.

Hoo anggor hasil  duat  dami ( teing /condo Piala anggor ata ba de umat kamping ema Uskup),

Porong le lema emas dite one ngaji nggeluk, le berkak de Mori, anggor ho’ jiri  dara run Mori Yesus,

Wiga sanggen weki serani ata tiba dara de Mori Yesus,

Wasa  wiga  wa’  taung  sala ata pande sengsara weki agu wakar;

Koso sangged nos one lonto golo,

Doro  taung  long  one mose  kelompok,

Wiga sanggen weki serani ,

Nggalas  nawa te  wewa Mori Adak.

Hoo liling  hasil  duat  dami ( teing /condo liling  ata ba de umat kamping ema Uskup),

Porong le ngaji dite, Mori Pu’n Gerak:

Teing  nera one nai lawa serani kudut nganceng  wewa gerak neteng bendar;

Ba nggalas neteng hae ata;

Simpa dia’  kamping hae liba.

Hoos wua haju hasil  gejur  dami ( teing /condo wua haju   ata ba de umat kamping ema Uskup),

Porong le ngaji dite, berkak de Morin  wau’  kamping  one sanggen  lawa serani;

Kudut  haeng  ata siod  kawed

Dumpa  sangged  apa ata  nuk’d

Wases  apa ata  siod  poli  haeng’d

Kawe apa siod  ata toe di hanged.

Yo…ema  Uskup, ata  letang temba agu laro jaong de weki  serani kamping Morin.

Tegi  dami porong tadang koe one mai ami sanggen da’t, deu koe tae jara;

Malir koe berkak de Morin  latang sanggen lawa Serani.

Teing heal one mose,

Porong  ngance tua hang gula;

Deko hang leso

Haeng hang mane

One lime hang wie

Tegi kole lami,

Porong weki Serani Indonesia,  ne nggitu kole weki serani se’ tana Sunda ho’:

Meler agu hae dedes

Tawa agu hae ata

Imus agu hae liwut

Tadang koe sangkar wajol woleng agama

Landing kali ga nai sa anggit, tuka sa leleng.

Sama po’e  ngger  one, sama  lewang ngger peang

Bengkes dami, porong le berkak de Morin,
Imbi dami kamping Mori agi Ngaran:
Kimpur neho kiwung,  sirang neho rimang
Neho pateng wa wae,  worok eta golo

Yo……ema Uskup,

Hitus…..tombo  dasor lites  ongko’d

Hitus…..torok  dasor lites  songko’d

Hitus…..curup,   dasor lites  tungku’d

Hitus…..tura  dasor lites  nunga’d

Hitus…..jaong   dasor lites  baro’d

Hitus…..kinda  dasor lites  pinga’d

Porong senget le Mori le, pinga le Mori sina

Toe manga banan imbi dami, landing Yesus Kristus Mori dite……….       Amen. 

VMG,  26 Maret 2016, JPS,  1 dan  8 April 2016.

___________

https://www.youtube.com/watch?v=Z11nOc35cxA

GUBERNUR NTT DAN BUPATI MANGGARAI MASUK DI GENDANG WELA.