TOMBO INJIL
http://atamanggarai.blogspot.com/search/label/teks%20buku%20nggeluk
KREBA DI'A LESO HO'O 29 JULI 2012
PAKA NARING GA LITḖ MORI KRAẺNG (29-07-12)
1 Poli hitu ga Yésus téti te ngo ngger sina Sano Galiléa, ko Sano Tibérias.
2 Ata do lako londang lut Hia, ai isé poli ita’d sanggé’d taung tanda lenget ata poli pandé’d Liha latang te ata beti.
3 Poli hitu Yésus tuké ngger éta ca golo agu lonto nitu agu sanggé’d ata nungku Diha.
4 Leso ramé mésé Paskah ga, leso ramé mésé data Yahudi, tiong te cai’y gi.
5 Cang du Yesus lélo lupi baling-baling Hia agu ita’s Liha do kéta ata ata mai lut ngger cé’é Hia, mai taé Diha ga ngger oné hia Filipus, “Nia wa’n ité ngancéng weli roti, kong sanggé’d isé so’o ngancéng hang’d?”
6 Hia taé ne nggitu kudut te damang hia Filipus hitu, ai Hia weki Ru’n baé apa ata nanang te pandé Diha te ho’o’n ga.
7 Mai walé diha Filipus ga ngger oné Hia, “Koném po roti ata harga suaratus dinarn é Mori toé kin di ngancéng sakong isé so’o, koném po isé hanang tiba ca kepu/ketek koé’n roti hitu.”
8 Cengata ata oné mai ata nungku Diha, hia Andréas, asé-ka’é diha Simon Pétrus, taé ne nggo’o ngger oné Hia,
9 “Cé’é ho’o manga cengata anak koé; hia hitu manga ba lima’d roti jelai (hosu) agu sua’d ikang’n; maik capa laing’y bokong situ latang te ata do so’o ga?”
10 Mai taé de Yésus ga, “Damang dé jera ata so’o te lonto’s di.” Sina dungka osang hitu do todo remang’n. Poli hitu lonto’s ata situ ga, am lima sebu’d hanang ata rona’d kali.
11 Poli hitu Yésus emi roti hitu, agu torok taé delék agu poli hitu pu’il-pu’il Liha te pati-pati ngger oné isé’d lonto sina hitu’d, ne nggitu kolé apa ata pandé Diha oné dungka ikang-ikang situ, jiri’d ga do keta’s lorong apa kaut ata ngoéng disé situ.
12 Cang du poli becur’d isé ga mai taé Diha ngger oné sanggé’d ata nungku Diha, “Damang dé nongko’s le méu retang’d roti situ rantang boto oke bo ne nggitu kaut’d.”
13 Poli hitu cébong nongko’s lisé, agu hasil’n ga manga campulu sua roto ata penong kéta le retang’d oné mai lima roti jelai ata siot poli hang’d lata situ ného bao’n ga.
14 Cang du ita’d lata situ tanda lenget ata poli pandé’n Liha ga, mai taé disé, “Hia ho’o dé ata tetu’ung kéta nabi ata te mai’y tay ngger oné lino ho’o.”
15 Ai baé le Yésus ngong ata do situ nanang te ba Hia le paksa molé kudut te téti jiri raja laing Hia lisé, wiga Hia Yésus gélang-gélang ngo inggos-pesot’N ngger éta ca poco; Hia ngo hanang koé’n kaut.
HO’O DẺ REWENG DE MORI KRAẺNG:
PAKA NARING GA LITḖ YḖSUS KRISTUS
@Copyright terjemahan: Fransiskus Borgias M. (Anggota Pakar LBI)
KOTBAH RM. INO SUTAM
https://www.facebook.com/inosensius.sutam.9/posts/1067394893431800
Selamat berhari minggu. Ini homeli Bahasa Manggarai hari ini. Maaf saya tidak menerjemahkannya dalam Bahasa Indonesia
Toing agu titong, Leso Minggu Bon te Telu mpulu Telun, 18 November 2018
(Daniel 12:1-3; Ibr. 10:11-14,18; Mrk. 13:24-32)
Endé-ema, asé-ka’é ata momang Morin agu ata momang le Morin. Poli séngét cama de lité reweng de Morin latang te ité oné telu bacang bao.
Bacang te can wéwa kamping ité curup de Morin ata dengé le Daniel le létang témba de malékat. Telud icin bao. Te can, manga tuan tai ca adak mésé, ngasang hi Mikaél. Hia te toing, titong, agu sémbéng mosé de wa’u ko banca Israél. Te suan, manga ca bari tai ata penong le kéot, susa, agu penet mésé, maik Morin toé ledong agu oké isét Israel. Isét Israel andongs, hésings, tadangs (luput) oné mai kéot agu susa hitu. Te telun, susa agu penet hitu cama ného doku te tepi, kudut kolors isét wintuk di’a agu wintuk da’at. Isét gawas nais ita néra agu géraks oné moséd agu haéng lisé mosé tédéng lén, maik isét wintuk da’at manté lisé mericu agu ampus.
Oné bacang te suan ata emi oné mai surak latang te ro’éng serani oné Ibrani, séngét lité sua rajan: te can, woléng de imam ca bana agu imam mésé, ngong hi Kristus. Imam ca bana takung agu condo podo pisa-pisa ngkalin maik toé ngancéng koso ndékok, maik hi Kristus podo cengkalin takung nggeluk oné weki run ngancéng koso ndékok. Takung misa nggeluk néténg leso minggu ko néténg bari pandés lité oné agu le ngasang de Mori Yesus Kristus, imam, tuang, agu adak mésé agu mengit kéta. Podo agu condo dité oné takung misa nggeluk te koso jogot, te waci saki, te tapa rangkat, agu te wégo ndékok. Pedé te suan oné bacang te suan bao, le podo agu condo de Mori Yesus sanggén ata balin koda taungs agu ciri tangé wa’i laings, maik pandé .
Oné bacang Injil séngét lité bao, te can, tombo du turung cemoln tana lino, manga tandan: nendep mata leso, pa’us ntala, gégo awang agu seménan ata manga éta awang. Te suan, du hitu Mori Yesus mai oné rewungy, hia kudut nekek taungs sanggén ata poli lir agu piléd Liha. Néténg leso Mori Yesus mai wanta agu siro ité kudut nekek taung oné impung te naring hia, te tegi ampong agu berkak. Te telun, curup agu reweng de Morin mangay tédéng lén, koném cemols tana lino agu awang.
Pedé de telu bacang leso ho’o kamping ité.
Te can, mosé dokong dité oné lino ho’o, ai lino ho’o manga tara cemoln ného taé de Injil. Oné mosé dokong ho’o manga kéot, susa agu penet ného taé oné bacang te can. Oné mosé dokong lino ho’o manga ndékok ného taé de bacang te suan. Maik Morin oné imam mésé agu mengit Mori Yesus maiy kamping itéY te toing, titong, te karong salang agu te sémbéng itéy. Morin wéwa gérak agu néra, kamping ité ného taé de bacang te can, Hia koso jogot, pandé nggélok oné mai ndékok de sanggén ité ného taé de bacang te suan, agu ngoéng te nekek sanggén taung ité ciri ca impung ata rinduk koném woléng loké agu rombéng moséd. Mai ga ité téti agu wuka naid kamping Jari.
Te suan, pecing agu noing lité te ité ho’o merik wekid, koé moséd, néhot toé manga mberes rud. Noing kolé lité dod susa, kéot, agu penet oné mosé dité, ného taé de bacang te can. Cama ného lino manga tara cemoln, ného nggitu kolé pintar dité, bora dité, adak atau cau lité, gori agu wintuk dité manga tara langang agu cicingn, agu manga kolé tara cemoln. Landing hitu ného taé de bacang te can mai ga ité racang rak te saka randang de Morin Ngaran kudut manga gawas agu nggalas oné ranga agu wakard. Mai ga ité condo agu podos sanggéd koé mosé agu merik weki dité oné Mori Yesus ai Lihas pandé besikd (menyempurnakan) kudut nentid oné weki ba nggelis, loléngs oné mosé ba roés, lors oné porong kudut mongko lonto. Mai ga péntong oné mai ndékok, ai le Mori Émbongs wégod kudut mangan nggélok agu émbong ka’éng béo. Nggitu taé de bacang te suan.
Te telun, mai ga ité liup lipur te ciri impung te ciru wintuk ata nipun. Hituy pedé de ntaung te impung ho’o (Tahun persekutuan 2018). Mberes agu wakén impung dité podo agu condo de Mori Yesus ata tenang lité te ho’on oné takung Misa Nggeluk. Hitu pedé de bacang te suan bao. Nitu séngét lité reweng de Morin ata manga tédéng lén, taé de Injil bao. Hituy wakén agu nawan mosé dité, kudut ité ciri ata pilé le Morin, ciri ata nggeluk, kudut néka manga mericu (kehinaan, kemiskinan) agu ampus (kebinasaan). Le hitu besik weki dité, nipu wintukd, mongko tombod kudut podo ata do oné molor, mangan bombong ného wéla lokom oné mai Mori Wowo. Amén
Ruteng, 17 November 2018, Rm. Ino Sutam.
Toing agu titong, Leso Minggu Bon te Telu mpulu Telun, 18 November 2018
(Daniel 12:1-3; Ibr. 10:11-14,18; Mrk. 13:24-32)
Endé-ema, asé-ka’é ata momang Morin agu ata momang le Morin. Poli séngét cama de lité reweng de Morin latang te ité oné telu bacang bao.
Bacang te can wéwa kamping ité curup de Morin ata dengé le Daniel le létang témba de malékat. Telud icin bao. Te can, manga tuan tai ca adak mésé, ngasang hi Mikaél. Hia te toing, titong, agu sémbéng mosé de wa’u ko banca Israél. Te suan, manga ca bari tai ata penong le kéot, susa, agu penet mésé, maik Morin toé ledong agu oké isét Israel. Isét Israel andongs, hésings, tadangs (luput) oné mai kéot agu susa hitu. Te telun, susa agu penet hitu cama ného doku te tepi, kudut kolors isét wintuk di’a agu wintuk da’at. Isét gawas nais ita néra agu géraks oné moséd agu haéng lisé mosé tédéng lén, maik isét wintuk da’at manté lisé mericu agu ampus.
Oné bacang te suan ata emi oné mai surak latang te ro’éng serani oné Ibrani, séngét lité sua rajan: te can, woléng de imam ca bana agu imam mésé, ngong hi Kristus. Imam ca bana takung agu condo podo pisa-pisa ngkalin maik toé ngancéng koso ndékok, maik hi Kristus podo cengkalin takung nggeluk oné weki run ngancéng koso ndékok. Takung misa nggeluk néténg leso minggu ko néténg bari pandés lité oné agu le ngasang de Mori Yesus Kristus, imam, tuang, agu adak mésé agu mengit kéta. Podo agu condo dité oné takung misa nggeluk te koso jogot, te waci saki, te tapa rangkat, agu te wégo ndékok. Pedé te suan oné bacang te suan bao, le podo agu condo de Mori Yesus sanggén ata balin koda taungs agu ciri tangé wa’i laings, maik pandé .
Oné bacang Injil séngét lité bao, te can, tombo du turung cemoln tana lino, manga tandan: nendep mata leso, pa’us ntala, gégo awang agu seménan ata manga éta awang. Te suan, du hitu Mori Yesus mai oné rewungy, hia kudut nekek taungs sanggén ata poli lir agu piléd Liha. Néténg leso Mori Yesus mai wanta agu siro ité kudut nekek taung oné impung te naring hia, te tegi ampong agu berkak. Te telun, curup agu reweng de Morin mangay tédéng lén, koném cemols tana lino agu awang.
Pedé de telu bacang leso ho’o kamping ité.
Te can, mosé dokong dité oné lino ho’o, ai lino ho’o manga tara cemoln ného taé de Injil. Oné mosé dokong ho’o manga kéot, susa agu penet ného taé oné bacang te can. Oné mosé dokong lino ho’o manga ndékok ného taé de bacang te suan. Maik Morin oné imam mésé agu mengit Mori Yesus maiy kamping itéY te toing, titong, te karong salang agu te sémbéng itéy. Morin wéwa gérak agu néra, kamping ité ného taé de bacang te can, Hia koso jogot, pandé nggélok oné mai ndékok de sanggén ité ného taé de bacang te suan, agu ngoéng te nekek sanggén taung ité ciri ca impung ata rinduk koném woléng loké agu rombéng moséd. Mai ga ité téti agu wuka naid kamping Jari.
Te suan, pecing agu noing lité te ité ho’o merik wekid, koé moséd, néhot toé manga mberes rud. Noing kolé lité dod susa, kéot, agu penet oné mosé dité, ného taé de bacang te can. Cama ného lino manga tara cemoln, ného nggitu kolé pintar dité, bora dité, adak atau cau lité, gori agu wintuk dité manga tara langang agu cicingn, agu manga kolé tara cemoln. Landing hitu ného taé de bacang te can mai ga ité racang rak te saka randang de Morin Ngaran kudut manga gawas agu nggalas oné ranga agu wakard. Mai ga ité condo agu podos sanggéd koé mosé agu merik weki dité oné Mori Yesus ai Lihas pandé besikd (menyempurnakan) kudut nentid oné weki ba nggelis, loléngs oné mosé ba roés, lors oné porong kudut mongko lonto. Mai ga péntong oné mai ndékok, ai le Mori Émbongs wégod kudut mangan nggélok agu émbong ka’éng béo. Nggitu taé de bacang te suan.
Te telun, mai ga ité liup lipur te ciri impung te ciru wintuk ata nipun. Hituy pedé de ntaung te impung ho’o (Tahun persekutuan 2018). Mberes agu wakén impung dité podo agu condo de Mori Yesus ata tenang lité te ho’on oné takung Misa Nggeluk. Hitu pedé de bacang te suan bao. Nitu séngét lité reweng de Morin ata manga tédéng lén, taé de Injil bao. Hituy wakén agu nawan mosé dité, kudut ité ciri ata pilé le Morin, ciri ata nggeluk, kudut néka manga mericu (kehinaan, kemiskinan) agu ampus (kebinasaan). Le hitu besik weki dité, nipu wintukd, mongko tombod kudut podo ata do oné molor, mangan bombong ného wéla lokom oné mai Mori Wowo. Amén
Ruteng, 17 November 2018, Rm. Ino Sutam.
Tidak ada komentar:
Posting Komentar