KEPOK - Misa lau Atmajaya Jakarta

PEPIL  RAME MISA INKULTURASI MANGGARAI

TENANG 100 TAHUN GEREJA KATOLIK MANGGARAI

KKM – JAKARTA

UNIVERSITAS  KATOLIK  ATMAJAYA  JAKARTA ,

17 DESEMBER 2011

 

Pembukaan:

Yo..., Ema Uskup, Ema-ema Pastor , Suster,  Ende –Ema Dewan  Komunitas Keluarga Katolik Manggarai  (KKM), Ema-ema, ende-ende  Dewan Yayasan Pora Plate, Ende –ende  agu Ema-ema Panitia Perayaan 100 Tahun Gereja Katolik Manggari   agu sanggen lawa Serani Manggarai

ai du pu’ng agu wangkan,

peang wewa,  ceen mai

Betuan,

Ai leso ho’

rapak reke,  raup bantang

Te adak takung Misa Nggluk,

Misa  Inkulturasi  te  tenang   100 ntaung Gereja Katolik  Manggarai,

One Misa hoo  dite,  

neki weki  - manga ranga, padir wa’i -  rentu sai

Te naka Mori Adak

Te naring Mori Jari

Te somba Mori Momang

Te senget Mori Dedek

Te wali sanggen  di’a  de Mori agu Ngarang latang titong agu sembeng Diha one mose leso-leso lawa Serani Manggarai wiga umur 100 ntaung Gereja Katolik one tana Manggarai.

Yo……,

Latang nai ngalis  agu  tuka ngengga dite

Latang  nau  gauk,  di’a  giwat   dita

Ami  panitia Misa, se – JABODETABEK _ ,

pu’ung awo mai Par,  dengkir   sale mai Kolep,

Pu’ung le mau Ulun, dengkir   lau Wain,

Naka  agu  kapu  , tiba cai dite.

Neho joeng   tuka koeg

Neho  tendeng   tuka mese.

Latang mai dite…

Naka lami, sama wua Nangka toe  labar - labar

Kapu  neho wua  pau  toe pa’u,

Pola  sama  pola wokat, toe gomal

Sepak  eta ledar

Su’ng eta ulu.

Yo, … Ema  Uskup  ague ma  Pastor,  rantang mu’ kanang,

Kepok…….. (setelah itu, serahkan  botal bir kepada  Ema  Uskup /Pastor)

Yo…, ite ema  Uskup  agu  ema  pastor,

Korong kok – potang iring

Letang temba – laro jaong

Sampan ba  -  motor  podo,

Sangged reweng le lawa serani kamping Mori agu Ngaran

One leso hoog ami, wan koe etan tua

Neki weki – ranga  ranga

Padir wai’ – rentu sai’

Kope oles – todo kongkol

Nai ca anggit  tuka ca leleng

Betuan:

Mai hopi kamping Morin, ai Morin rinding toni

Mai sawal kamping Ngaran, ai  Ngaran candang wakar

Yo…, one adak  takung misa nggluk hoog ami

Nai ca anggit  tuka ca leleng

Te naka  Mori  Adak, Senget  Mori Dedek

Latang di’a   Diha  te  tino agu titong  lako de Gereja Katolik Manggarai  wiga  umur 100 ntaung.

Don nggengga agu keot,  don gerak agu  nendep one  ata lako de Gereja Katolik.

Landing nitu main:

Naring ….. Mori  Jari

Sembeng…. Mori  Dedek

Naka ……. Mori  Adak

Ai wiga leso hoo,

Gereja Katolik  Manggarai,

Wake celer ngger  wa,  saung   bembang  ngger  eta

Beka  agu  buar weki  Serani  Manggarai:

Manga ata:

Lami tana  taki  - riang  tana  dima  -  Manggarai

Long  neteng  golo -  labar  neteng tana

Sekola  neteng  kota -  belajar  neteng  bendar

Te latang di’a  de Mori Jari,

Ami  condo  ca  o  ca   one  mose dami, 

Weki agu wakar,

Mose  agu mata,

Di’a   agu  da’t

Toe hemong,

Ami condo agu ite, Gereja  Keuskupan Ruteng – Manggarai,

Lawang sangged  Ema-ema Uskup, ema-ema Pastor, Bruder, Suster,  frater, katekis, guru  gama, agu sangged awam ata  pande beka agu buar imbi Serani one Tana Manggarai. Latang ised ata ngai mosed, ngaji dami Mori: bolek  koe  loke’d, basa koe ranga’d.

Latang ise so’d   poli  pa’ng  be  le: ampong  koes  ndeko’d, cengka koe para Surga lite  kudut ise mose tedeng len  eta Surga  agu hae diding  one Imbi,  Malaikat  Serafim  agu  Kerubim

Yo Ema Uskup  agu  Ema  Pastor,

One takung   misa  hoo

Ami condo   sangged cau o ca bate  gejur agu gori dami

Hoo’y  roti ,  tunti    weki  run Mori  Yesus

Porong de roti   hoo:

Mberes Imbi Serani  One tana Manggarai:

Wake celer  ngger  wa,  saung  bembang  ngger  eta

Uwa haeng wulang  – langkas  haeng   ntala

Jengok  le  ulu, wiko  lau  wa’i

Temek  wa,  mbau  eta

Pateng  wa  wae -  worok  eta  golo

Kimpur heno kiwung – ciring  neho  rimang

Hoo’y  anggor,  tunti   dara run Mori  Yesus

Porong de roti  hoo:

Waci sangged  taung  saki  one nai de lawa Serani,

Koso taung long  one golo le lawa lonto leok

Oke  kose  one  mose  de  sanggen  taung  roeng

Wiga, 

mora mael  tuke angkep

Mora masa  lako satar     -  one mose leso-leso .

Hoo’y  liling, tunti  gerak run  Mori  Yesus,

Porong le liling hoo:

                Gerak nai de lawa Serani te

Hur pucu  kudut dumpu’s  ata  nuk

Rani  nai  te  cai le rahit

Harat nanang  cai le batas

wantil ngalis   one  rami

lengkang  salang    one satar

Toto  molor  kamping Mori Wowo

Pio-pio wae io, paes –paes  wale tae.

Betuan, kudut mesen ngasang Dite, Mori agu Ngaran

Wiga,  gerak nera neteng  bendar (beang),

Ai  manga momang  agu mohas  nekeng  oka.

Hoos, wua hajo agu wela po'ng,  wua  lime  hasil gori  agu gejur dami

Porong berkak koes lite, 

Kudut  mose  dami:

Mese bekek -  mbiang gala

Ger  tengu  -   baca ranga

bolek bocel

Te tegu becur, kaing dani

Wiga one gori  agu  gejur  mose dami, 

haeng mose mane    -    tua mose gula

ita atan dia’n             -     dumpus  ata     nuk

paeng  ata wase’y     -     ita’y  ata  mila

Eme dua’t ngger  peang  uma koe’m,

sama rangka lama,

neka wenul  ali watu – neka sunur  one wuku

Wee ngger  one  mbaru koe’m

sama  lawe  luja

neka sumang dungka – neka pala  ranga

Sangger  gejur   agu  gori  dami  kali  ga,

 Porong,

Kete api one tela  galang peang

Wua  raci tuke, lebo kala  po’ng

Ha’eng  woja  mbaek, gok latung soko.

Hoos, bunga, wua  wua  lime  hasil gori  agu gejur dami

Porong berkak koes lite,  kudut  mose  Serani  dami:

Wesak  “wela Momang”  neteng  beang

Tiwit  “wela  imbi  Injil”  neteng  Cicing

Wewa “wela  Panggol  Yesus” netang  kampong

Yo… ema Uskup  agu  Ema  Pastor,

Hitus  torok…am  toe   kop

Hitus  tura… am  toe  nunga

Hitus  bajar… am toe rapak

Hitus  gesar… am toe  belar

Ole…….. one  ite hituy kali papong  dami

Ai ami hoo, 

manusia toe  genap 

beo penong ngekok , tana  lanar  sala

Lino dami poong  toe jari,

Weri tete senggeng   -   Weri daeng macet

Wiga hitun kali ga…

Tegi ngaji  dite

– ata laro jaong – letang temba -  , kamping Mori agu Ngaran

Sangged    gesar, tilir, ngaji   dami   , ami condo one  Mori dami,ata urang  tali wua  ,  Yesus Kristus ,  Mori dami…………..  Amen