KANDO NIPI DA'T

KANDO NIPI DA'T :

KANDO NIPI DA'T:  KETI BETI – KANDO DANGO –  WUR  RUSUK  - WEAR PEMPANG

Latang ata Manggarai, Nipi hitu gori de wakar. Manga nipi dia' landing manga kole nipi da't.
Eme  nipi dia'  tantu senang nai. Landing eme nipi da't,  kemas nai laing, ai nganceng ba beti, wiga sopel mose, manur nawa. Eme  sampe sopel mose, hitu ata pande siek ide. "Idek go..., salang wada go, sopel mose go. Tantu toem ngoeng data tiba sopel  mose agu salang (calang) wada ho'. Wiga eme manga nipi da't perlu kandoy.

Latang ata Manggarai, te kando nipi da't hitu, perlu manuk anak  miteng. Manuk hitu ngaji (wada) olo mai mbaru kaeng poli hitu ba one salang dangka tem mbelen. One salang dangka hitu, eme poli mbelen, teong le lawe miteng manuk hitu wiga saru tana.

1. Manuk Miteng: adak manuk  miteng ho' le mane tana (kudut nipi da't one lesos saled)

Ne nggo' wadan:

Tara saum laku hau' manuk miteng, ai manga rajan. Rajan hitu manga nipi da't. Nipi hitu: .........(saro nipi hitu). Nipi da't situ porong neka mamur nawa, neka sopel mose. Aik hitu taran saum lami hau manuk miteng. Te kando sangged nipi da't situ. Ba le hau taung, one lesos saled, one waes laud. Neka manga rusuk agu ringang. Eme manga  manga buru da't data ata pande sopel mose, salang wada, nek sai' se's. Ba le hau taung. Neka seke nungan buru da't data pande mamur nawa, pande sopel mose. Ba le hau taungs manuk miteng. Ho's adak kandod lami. Porong one lesos saled, one waes laud.  Teing kali g  kamping api, bolek loke, basa tara. Wur  sangged rusuk, kando sangged dango....Amen.

(Manuk miteng neka hang nakeng. Biar one salang dangka kaut. Neka ba ngger one mbaru).


2. Manuk lale: petu wakar

Latang ata Manggarai, mangan  nipi  da't  wajol  kesasar wakar, mbeong  toe bae salang, wiga ngo one pong dopoy, ngo one ngalo masay.  Perlu petu (kukut) wakar hitu rantang sara run.

Hitu betuan manuk lale ho: te petu wakar rantang ruda lalang kap


Sai one mbaru, olo mai para pande adak manuk lalle te petu wakar:

Ne nggo wadan:
Tara saum lami hae manuk lale.Hau te kukut wakar dise......... ata sekilo. Sangges meu wakar, emo ga lalang kap  agu mbeong salang. Mai kole one weki, one kilo, one mbaru. Neka ngo one po'ng dopo, neka ngo one ngalor masa.  Mai ga   kole ngger one weki  dami,....... amen.

Poli hitu mbele manuk, hang nakengn.

JPS, 5 Agustus 2017.

Ngobrol agu Kraeng Largus one Golo Karot - Lembor