WANGKAN KODE

Kode: Darwin Vs Nunduk Manggarai

Du cekeng kalek. Wear kaut skola’n hia Largus, lampuk ngo one uma campe ema’n. Lonto one klas II SMTP Cancar hia Largus dut hitu. “Mai nana, campe cau kaba so’o hau!” Nggitu tae de ema’n dut cain hia Largus.
Teku wa temek sawa hia Largus. Tiba wase agu haju koe te ongga riti de kaba kalek. “Hiaaa! Holesss!” Ciek diha Largus jera lako agu holes kaba. Ema’n ga hese eta pematang. Mbous rongko koli.
“Asa koe skola’m ta nana?! Di’am molor koe?!” rei de ema’n. “Ma’u ta ema! Oe… ema! Bae lite co’o pu’ung wangka’d ata ko? Ite ho’op ta ema!” Rei diha Largus. “Co’o?!” rei le ema’n. “Ai bao di baen laku e… ema. Kali itet manusia pu’ung wangka’n danong, one mai kode.” “Tae diong hau e?!” “Co’op ta ibu guru bao ta ema. Lorong tombo diha Darwin.” nggitu torok di Largus. “Aeee….pina naeng. Imbi keta toe raja’n le hau hia Darwin hitu. Nggitu kole lorong bodok’n ibu guru de hau!” Cica de ema’n. “Hae, co’o tara nggitu’n tae diha ema ga?!” Rei di Largus. “Senget hau e! Toe nggituy e! Toe manusia one mai kode! Maik, kode pung wangkan one mai manusia!”  “Ae…mbamba diha  ema..eee!”  “Toe mbamba daku ta! Tombo tu’ung!  Senget le hau!
“Danong du cekeng walis agu darum mese, manga ca anak koe tegi hang agu ende’n. Ba leke koen. ‘oe…ende…darum keta kaku ta ende…. tegi hang!’ nggitu taen. Toe bao nggo’o toing le ende’n ‘nana, toe manga hang’, maik jera liha anak’n hitu ngo one ema’n, ‘nana, tegi one ema’m hang.’ O…de ngo anak koe hitu agu leke koen. Nggilek tegi agu ema’n. Mai kole ema’n jera ngo one ende’n. Ngo hia one ende’n. Jera kole le ende’n ngo one ema’n. Nggitu’m taung. Cumpeng agu beti nain anak koe hitu. O…de ngo one sapo. Emi liha kebor. Cut one ngua riti’n. Emi liha leke, na’a eta sa’in. Aeee… jiri kode’p anak koe hitu ta! Neho weter ende agu ema’n. Calak idego ise ga, nggekar eta pu’u haju anak koe hitu ga. Agu mora’n one puar mese. Nggitup pu’ung wangka’n  kode hitu ta nana!” Nggitu nunduk de ema’n.
“Nggitun ko ema. Am hitu tara koed koe weki de kode. Kali anak koe danong du wangka’n.” “Eng ta de! Hitu kole tara neho keta ba weki de anak koe de kode hitu! Aeee…toe neho pina naeng tombo diha Derwin ko Darwin hio bao! Pecing apa’n ata hitu ta!”
“Neka nggitu pande aku liha ema agu ende. Boto jiri kode kaku!” “Eme toe molor skolah’m hau ta, jiri neho kode!”
Emon wa, “oe ema! eme neho tombo diha ema hio ga, oleee asi dolong agu ceka le korung lite kode. Ai neho mbele anak koe kole hitu ta ema! Eme hang lite, nuru’n ….ole cama neho hang nuru de anak koe!”
“Ta de… tombo nunduk hitu e!”*
 http://compang.wordpress.com/2006/03/22/kode-darwin-vs-nunduk-manggarai/